Situat en extrem nòrd-occidentau dera Val d’Aran, ena província de Lhèida, comunitat autonòma de Catalonha, Bausen ei un pòble dera Val d’Aran «que tèrmie» damb França e damb era region Occitània. Eth municipi includís eth nucli istoric de Bausen e era zòna comerciau de Pontaut ath long dera carretèra e apròp deth pònt que trauèsse er arriu Garona.
“Bausen encara sauve, intacte, eth gust de pòble pirenenc e pòt presumir d’èster un des nuclis aranesi mès polits com ua resèrva d’originalitat e autenticitat dera Val d’Aran. Per quauquarren se pense que Bausen siguec eth prumèr pòble dera val. (…). Es sues cases de pèira an tengut ath long deth temps, e emparades pera Sèrra de Vacanera, amaguen damb umilitat era beresa idillica d’un pòble de montanha, coma s’eth hèt de vantar-se deth sòn encantament hesse a desaparéisher er atractiu que i a enes sòns carrèrs de pèira, estreti e gradonadi. Era nòta pirenenca, qu’ei de bon veir enes sues façades, damb es sues balconades de husta e enes sòns losats, s’enquadren enes terrasses de uarts, camps verdi (…). Era panoramica que se pòt veir de tota era val, de Coret estant, hè era sensacion de trobar-se en un endret unic e en un guardader a on se capte tot eth paisatge en ua fotografia totau o en ua postau tridimensionau.”
Santiago Temprado, Bausen, Un valle, un rio, un pueblo, un señorío
© Francisco Javier Mateo
Bausen gaudís d’un Patrimòni Naturau e paisatgistic preservat, d’un Patrimòni rurau arquitectonic unic e d’un Patrimòni culturau fòrt damb era sua lengua e es sòns costums viui.