Dempús d'auer seguit ua formacion apicòla e d'auer dedicat diuèrsi mesi de recèrca as abelhes e as plantes mel·lifères dera Val d'Aran, aué hèm un nau pas damb era installacion deth prac d'abelhes d'Es Sarnalhèrs.Aguest projècte s'inscriu ena continuitat deth libre Es flors des abelhes, realizat laguens dera colleccion Pinta eth tòn patrimòni. Entara sua elaboracion auem coneishut apicultors dera val, estudiat es plantes mel·lifères locaus, observat eth foncionament des bornats e documentat eth vocabulari aranés ligat ara apicultura.
Aguesta recèrca mos a permetut compréner milhor eth papèr essenciau des abelhes enes ecosistèmes de montanha, atau coma es prigondes transformacions que viu aué era apicultura, confrontada a naui predators e as cambiaments environamentaus.Era installacion d'aguest prac d'abelhes constituís ua naua etapa d'aguest camin. Mès enlà dera produccion de mèu, entà nosati se tracte de contunhar un trabalh d'observacion, d'aprenentatge e de transmission, ath mès près possible deth monde viu. Agradim fòrça a totes es persones que compartiren damb nosati es sòns coneishements, es sòns rebrembes e era sua experiéncia, ajudant atau a mantier viu aguest patrimòni de sabers e de practiques.
El llibre *Es flors des abelhes*, publicat com a part de la sèrie *Pinta eth tòn patrimòni*
